Em’catiau d’ieau eyé m’vié clotier

J’su v’nu au monde in vingt noef
L’année qui vié, j’daurai quarante noef
El prumier souvnir d’em villoge
Ch’tà l’église que j’lai fait dins les bras d’Marie Leblois
Em prumière pourmenode.
L’deuxième ché l’catiau d’ieau
Qui à certains moumints pierd ses ieaux
Qui a grandi in même temps q’mi
Bié seur ché mi qui est d’moré l’pu p’tit
D’vin tous les deux à l’occosion j’ai grimpé
Su l’catiau d’ieau comme d’vin l’clotier
Si d’vin l’prumier y pue l’clore
Dins l’deuxième ché l’brin d’coulons
Mais d’el toupette de l’un comme de l’aute
Cher Basèques comme t’es biau
Quand on t’ravise de ci-haut.
J’t’ai quitté pas certain moumints
Mais jamais pou bié longmint.
Comme tout l’monde in jou
J’mai décidé à accater in auto
Eyé quand arvenant de m’n’ouvroge
Ou bié r’venant din long voyoge
Q’cha fuche du pont d’granglise
Ou bié de l’borrière de Bury
D’Pierwez, d’el danse d’el sorcière
Ou bié d’monplaisi
À vos vie si près l’un d’laute
Vraimint comme deux amoureux
Je n’savoeye fonc dire seigneur merci
Ch’tin spectacle que j’vouroye vie toudis.
Avec l’ouverture de l’autoroute
J’avoeye pinsé cha va s’passer
Ouié ma mère cha a été d’pis in pis
El prumier cop que j’ai été à Tournai
In r’venant j’ai passé l’bertielle de Pierwez
Pou fai l’ceinture jusqu’à Blaton
Éyé là j’ai co r’cangé d’bertielle
Po m’artrouver à Bury
Basèques pou t’vie d’cop pu près.
In rintrant à l’maison j’ai dit pu jamais
À chaque mette eyu’s’ que j’ai passé
J’busoeye que j’passoeye su nos fous à l’cauche
Sacleu, Roland, Legrand, Pourbaix
Ayé cop combé d’autes
Ces monumints qui si longmint
On fait vive nos villoge
Eyé qu’on prétint q’l’autoroute
D’allois nos apporter d’l’ouvroge.
Mais j’ai r’vu si près l’un d’l’aute
Em vié clotier eyé m’catiau d’ieau
Qui r’présinte l’imoge de m’villoge
Basèques, je n’saroye pu t’quitter
Eyé pourtant in jou
Pou du bon y fourra bié
J’va t’dicter mes dernières volontés :
Qu’on faiche el mortuaire au catiau d’ieau
El messe d’intiermint bié seur à l’eglise
Quant à m’dernière pourmenode
Que les porteux fuch’te assez in guinse
Pou m’mett’d’in l’corbillord à l’orvier
L’tiette in avant les pieds pa dière
Ainsi tout in dallant à l’chemintière
Pou l’dernier cop j’arverrai
Tous les deux ci près l’un d’l’aute
Em catiau d’ieau eyé m’vié clotier
Quant au cheu qui f’ra l’inscription
D’su l’caillau au d’seur de mi
J’ve bié qui métiche
Ici repose Jean Ghiot
Né à Basèques in mille neuf chint vingt noef
Mais nié padsous décédé à Belel
In je n’sait nié co combé
J’seroye capobe de m’dérinvier
Quand cha n’sroi fonc pou l’agné
Alors que de m’vie
Jamais j’n’arai quitté
Basèques Corrière, el rue d’Condé
Eyues’que j’su né
Eyues que j’espère clapser
Bon dié tu sais ch’est quand tu vés
Quant à mi je n’su nié tellemint pressé
Eyé si cop pou in moumint tu l’permets
Laich’me dins l’villoge eyé l’rue
Eyuss’que maman m’a mis au monde
Eyuss’que j’n’ai rié fait d’maux
Si ch’n’est à l’occosion m’foutte du monde
Eyé si tu juges de m’rappler pou l’éternité
Invoeye m’au diape si j’lai mérité
Mais au moins in cop temps in temps
Quand cha n’s’roit fonc in cop par an
Lech’me r’vie m’villoge tout intier
Basèques que j’ai tant aimé
Vu d’tout là haut
Y doit ète cop pu biau
Basèques tout ramonch’lé
Tout autour d’em catiau d’ieau
Eyé d’em vié clotier.