Créer un site internet

J' vinds à crédit

Document communiqué par Marie-Emilie Monchaux

 

 

 

 

 

  

 

 

 

 

 

 

 

 

J' vinds à crédit  (Sur l’air de « Avec les pompiers »)

 1er refrain

Vos volez vos armeubler
Y n’a nié à hésiter
Accatez au mois
Douze ou vingt-quate fois
Mais qoui c’que ché d’cha.
Vos volez n’chambre à coucher
In salon,n’salle à manger
Perdez ‘l’a crédit
N’vos fait nié d’souci
Vos l’payerez toudis.
Si vos d’vez fait n’cure d’air
A l’montagne, à la mer
Vos n’avez qu’à d’aller
Vos l’paierez toudis bien après
Pouquoi tout vos arfuser
L’confort, les futilités
Avé l’facilité
Qu’on a tout maint’nant
S’tin jeu d’infant.

Monologue

Mes gins, avoez qu’nos avons n’belle vie
Quand il arrive l’heure d’aujord’hui
Quand on voit n’séquoi qu’on vouroit bié
Mais qu’malheureusemint on n’a nié d’yards pou l’payer
Pauf, sans s’in fait enne on l’accate
Quitte à broyer après du noir à l’jatte
Oui, j’vios intinds les viés
Y n’avui’te qu’à fait comme nous
Y n’avuin’te qu’à attinte, patienter
Oui, fort bié, j’su d’accord avé vous
Mais, dites in po, quand in vos mariant
Vos déciduies d’accater, mettons n’ salle à manger
Vos accatuies en quéyère à l’fois d’temps in temps
Pou dire dé n’ié trop gréver l’budget
Quand à la fin, vos arrivuies au buffet
L’prumière quéyerre, combé avoit-elle co d’pieds ?
Tandis qu’nos autes on accate tout d’un co
Quitte à l’ payer pindant dix ans si faut
Ché pu agréoble, on profite dé tout ‘n même temps..
Vos direz qu’on a du souci, du passe-temps
Pou payer quand y faut les mensualités
Qui eusse bié sûr n’attintent nié
Y faut r’counoitte tout d’même qu’el système a du bon
J’ai même décidé afin d’vos servi
Que mi oussi, j’d’alloye vinte à crédit
Pou mieux parler, j’crois même qui faut dire « débit »
Pac’que l’service que j’vas vos offrir
Plutôt que d’el payer après, y fourra l’payer d’vant
Et ch’est là justemint qu’il a in inconvénient
Et même chou qu’vos m’arez accaté
Vos l’recevrez fort longmint après
Du moins, ché tout chou qué j’vos souhaite
Vos êtes in train d’vos dire, y s’fout d’nous
Y vé nos fait passer pou des toqués, des fous
Patienche eyé écoutez :
J’m’in vas tout vos expliquer
Qui c’qu’est ché d’nous autes
Qui au momint d’quitter la vie
Qui ara été pou les uns un train d’plaisi
Pou les autes en vallée d’larmes
Qui c’qué ché qui, quand sonne el prumière alarme
N’a nié révé intérieur’mint
D’avoir in biau intiermint
Vous non, mi sié
Je n’sarwai nié m’impécher d’y pinser
Et ché jusremint chou qué j’vas vos offri
Suivant certaines conditions, tout d’suite, ej vos l’dis
Vos payerez suivant vos ambitions
Tous les mois, n’ petite caution
Qui permettra quand pou vous arrivera
L’moumint d’passer d’vie à trépas
Pou vos fait oublier que vos avez ravalé vos chique
D’vos fait in intiermint d’ène ampleur fantastique
Je sais, vos direz : j’ai des infants, des héritiers
Em dernier voyage, y pette bié l’payer
Possibe mais vos savez
D’sus cha, on n’pé nié toudis compter
Ou bé, à vos parints, vos n’layez rié
Et dins s’cas là vos povez vos consoler
Y brairons p’tet bié n’milette
Mais pou d’aller, vos n’arez nié d’mallette
Ou bié, vos leu layez du pognon
Et alors vos povez vos fait n’raison
Vos n’arez nié co frumé vos yés
Qui s’ront d’jà in train de s’touiller
N’vos fiez nié à l’z’ autes
Si vos volez, taleur ou in jou ou l’aute
J’passerai à vos maison
Pou vos fait mes conditions
Vos verrez les différints tarifs
Eyé j’sus certain, j’vé bié m’inracher les tifs
Que d’vant wiguer
L’contrat s’ra signé
Quand j’pinse au beau intiermint que vos pourrez avoir
Ché pu fort qué mi, j’in pierd el voix
Jé n’sarwai nié m’impécher d’braire
Ohj’nai nié l’chagrin qu’j’arwai à vos
Non mais quand j’pinse qué vos pourruie r’fuser
L’offre que j’fais pou vos plaire
A si bon compte comme in plaisi
Ténez pou vos convaincre des joies du crédit
Ouvrez toutes grandes vos oreilles
Vos n’intieremint, j’vas vos d’décri.


2ème refrain

In intièremint à onze heures
Trois curés, six infants d’cœur
L’musique, les pompiers
Tous les autes sociétés
Des gerbes, des bouquets
Par r’connaissance, par amour
Ej j’vos frai quat biaux discours
Si vos n’avez nié beaucop d’qualités
Mi, vos j’in trouv’rai
Vos arez in monumint dé deux mètes su quatre-vingt
In mèt septante du bas in haut
Et d’s’inscriptions tavau
Pou nié trop rode vos déposer
Au mitant dé l’tierre à dints d’t’chié
Pou l’publicité
Nos f’rons in arrêt
A chaque cabaret.

 

 

 

 

 

 

 

 

 

 

Date de dernière mise à jour : 05/07/2021

Créer un site internet avec e-monsite - Signaler un contenu illicite sur ce site